Ба муносибати солгарди навбатии ҷашни Ваҳдати миллӣ дар толори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд конфронси илмӣ- назариявӣ таҳти унвони “Ваҳдати миллӣ-пояи сулҳ ва заминаи пешрафти миллат” баргузор шуд.

Директори донишкада Хурсанд Содиқзода устодон ва донишҷӯёнро бо фарорасии ҷашни умумимиллии Ваҳдати миллӣ табрику таҳният гуфта, аз ҷумла афзуд, ки басо рамзист, ки тантанаҳои Рўзи ваҳдати миллӣ имсол бо тадбирҳои ҷашни 35-солагии Истиқлолияти давлатии Ҷумҳурии Тоҷикистон рост омада, дар таҳкиму тарғиби сиёсати инсонпарварона ва ваҳдатофари Пешвои муаззами миллат мўҳтарам Эмомалӣ Раҳмон боз ҳам такони нав мебахшад.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон дар мавриди Рўзи ваҳдати миллӣ ва сулҳи сартосарии Тоҷикистон изҳор доштаанд, ки «Мусолиҳаи миллии мо дар таърихи навини миллати кўҳанбунёдамон дастоварди бузург ва беназир аст. Аз ин рў, ҳар фарде, ки худро фарзанди Тоҷикистон медонад ва қадру манзалати Тоҷикистонро азиз мешуморад, бояд ба ин дастовард ҳамеша эҳтиром гузорад ва таҳкими ваҳдати миллиро рисолати шаҳрвандиву қарзи фарзандӣ дониста, ба халалдор гардидани он ҳаргиз роҳ надиҳад».

Ваҳдати миллӣ афроди миллатро муттаҳиду нерўҳои зеҳниву ҷисмонии онҳоро барои ҳифзи манфиатҳои миллӣ ва расидан ба ҳадафҳои умумӣ мутамарказ карда, миллатро ҳамчун низоми иҷтимоӣ ва сиёсӣ ташаккул медиҳад.

Воқеан ҳам, ин ҳуҷҷат сарчашмаи сулҳу ягонагӣ, ваҳдату якдилӣ ва ҳамдигарфаҳмию рафоқати мардуми тоҷик ба ҳисоб меравад. Рўзи ба имзо расидани Созишномаи умумии истиқрори сулҳ ва ризоияти миллӣ воқеан ҳам, санаи тақдирсоз ва саодатофарин, оғози созандагиҳои бузург дар Тоҷикистони навин аст. Барои мо ифтихори бузург аст, ки сулҳи тоҷикон ҳанўз ҳам дар ҷомеаи ҷаҳонӣ мояи омўзиш қарор дорад ва кишварҳои ҷаҳон аз ин сабақи таърихии тоҷикон пайравӣ мекунанд.

Сипас, филми ҳуҷҷатӣ доир ба таърихи Ваҳдати миллӣ ва саҳми Пешвои миллат муҳтарам Эмомалӣ Раҳмон дар сарҷамъии миллат ва рушду тараққиёти давлат намоиш дода шуд. Дар ҷараёни кори конфронс, иштирокчии Иҷлосияи 16-уми Шӯрои Олӣ, собиқадори меҳнат Бойпоччо Фатҳиддинов ва мудири кафедраи забонҳои давлатӣ ва ҷамъиятӣ Муҳайё Ҳотамова дар бораи таърихи Ваҳдати миллӣ ва роҳҳои ташаккули давлатдории миллӣ дар солҳои Истиқлолият маърӯзаҳо намуданд.

Таъкид шуд, ки Ваҳдат пойдевори ҳастии миллат ва ояндаи дурахшони Тоҷикистон аст. Албатта бо имрӯз шаҳрвандони мо даҳшати ҷанги шаҳрвандиро аз хотираҳо фаромуш накарда, арзиши ваҳдату бародариро хеле болову воло медонанд.

Муҳимтарин ва бузургтарин дастовард барои Ваҳдати тоҷикон ин Иҷлосияи 16-ум мебошад, ки волоияти қонун ва бо роҳи конститутсионӣ ҳал кардани масъалаҳои муҳими сиёсӣ аз он шуруъ гардидааст. Дар нахустин баромади хеш Раиси вақти Шӯрои Олӣ муҳтарам Эмомалӣ Раҳмон иброз намуда буданд: “Ман кори худро аз сулҳ сар хоҳам кард. Ман тарафдори давлати демократии ҳуқуқбунёд мебошам. Мо ҳама бояд ёру бародар бошем, ки то ки вазъро ором намоем. Ҳар чи аз даст меояд дар ин роҳ талош хоҳам кард”.

Ваҳдат ба инсоният танҳо ҳамфикрию ягонагӣ, дӯстиву бародарӣ ва меҳру шафқат меорад. Пас, ҳамин ваҳдат аст, ки моро барои расидан ба мақсаду орзуҳои дар пеши худ гузоштаамон сабабгор мегардад. Ваҳдат, сулҳ чӣ калимаҳои муқадасанд. Хандаи тифлону шодии модарон, тараққиёту пешравӣ ва ободии кишвар маҳз дар зери ҳамин калимаҳо ниҳонанд.

Инак дар сарзамини мо сулҳу ваҳдати комил ҳукумрон аст. Мо шукри ин неъмати ба даст овардаро карда бояд аз сидқи дил хонем, омӯзем ва дар пешрафту тарақии ҷамъияту ободии кишвари азизамон – Тоҷикистон саҳми босазое гузошта тавонем.

Сипас аз тарафи Комиссариати ҳарбии вилояти Суғд ва раёсати донишкада ба як қатор фаъолон ба муносибати ҷашни Ваҳдати миллӣ сипоснома ва туҳфаҳои хотиравӣ тақдим гардид.

Шуъбаи иттилоот ва кор бо ВАО